ISUA ZUI

            Tunlai khawvelah chuan darkar reilote chhungin hmun hla tak tak kan thleng thei a. Mel 1000 aia hla a mite nen awmhmuna inbia ang maiin kan inbe thei a. Ram hrang hranga thil thleng mek pawh Radio leh television hmangin kan hmuin  kan hre zung zung thei a. Mi za rual hna kha mi pakhatin computer hmangin a thawk thei ta bawk a. Thil thar hmuchhuakin mi thiam te an buai a. Heti khawpa hmasawnna karah hian awm mah ila, harsat manganna han tawh meuh chuan zawhna chhan har tak, chhan theih loh nia kan hriat kan la nei fo mai chu zawhna chhanna leh Isua zuitu rinawm nih dan chu vawiin thuchhiar ah te min hrilh.

            Vawiin chanchinthaah Isuan amah zuitute awm dan tur a sawi:

1. Mihring tan nunna hi ro hlu ber a ni a, A nunna a chan chuan engkim a chan a ni.

2. Nunna dawta mihring rohlu chu chhungkua a ni leh a. Chhungkua chu nu leh pa, unau leh faten an din a. Miin thihna avanga chhungkaw member a chan vek aia channa rapthlak leh hlohna nasa a nei thei lo ang.

3. Chhungkua bakah chuan in leh lo leh rote an ni leh a.

            Hengte hi Isua’n amah zuitutena an malmak leh an chan turte chu an ni. Isua thilphut hi engtizawng maha sawi nep chi a nilo na chungin a awmzia erawh sawifiah a ngai thung a.

             -Isua hian amah zui turin mahni nun titawp a, inthat turin min hrilh lova.

             -Kan laichin unaute leh nu leh pa pawh haw tur leh malmak turin min zirtir bawk lova. A ni pawhin a nu Mari  leh  a pa Josefate a haw lo.

            -Isua khan khatih lai Judate-ho tawng  Aramaic a hmang a. Aramaic tawng chuan hua(to hate) kan tih hi “tlema hmangaih lo zawk (hmangaih nep zawk) tihna a ni a. “Nu leh pa, unaute leh rosum aiin Isua zuitu chuan Isua a dah lalin a hmangaih zawk tur a ni” tihna a nih chu.

            Isua zui hi tawngka maia sawi hi a ni lova, thiltiha nuna lantir a nih avangin chik taka inenlet fo a ngai. Chuvangin, Isuan tehkhin thu hmangin amah zuitute’n nun an chhut a tulzia a sawi a ni.

            Mihausain in a sak hmain a in sak tur senso tur a neih leh neih loh a chhut hmasa tur a ni. Chhut hmasa lova a sak a, pawisa a neih daih leh siloh chuan a mualpho ang. Keini pawh Kristian ni si Krsta duh dan anga kan nun loh chuan mi nuihzatin kan awm mai mai a ni.

            -Raldo tura kal hmain hmanrua leh ralthuam a neih that leh that loh a chhut hmasa ang. Chuti a nih loha ral a do chuan hmelmaten an hneh mai ang. Keini pawh sual bei tur chuan, Isua chaknain kan inthuam em tih inen lova kan nun chuan Setanan min hneh mai dawn a ni.

            Thlarau thianghlim tanpuinain Isua kan zui thei.

            Amah zuitute nun dan tur a sawi hnu pawhin Apostolte chuan Isua an kalsan duh chuanglo. Tun thlengin mi tluklehdingawn aia tamin Isua chu zuiin an nuna lalber atan an siam a. Isua’n Zanriah hnuhnungah “Thlarau Thianghlim, Pa in ka hminga a tirh turin engkim a zirtir ang che u a inhnen a ka sawi pawh a hriat nawn tir ang che u” (Jn 14:26) tia apostolte sawi lawk chu Penticost ni chuan an chungah a lo thleng a, hlauhna nei lovin hauisen takin chanchintha an puang ta a ni. Chu thlarau thianghlim chuan an nun a thlakthleng a, an rawngbawlna chu an thihchilh ta vek a.Keini pawh Thlarau Thianghlim chakna lo chuan Isua kan zui thei lo. Thlarauin min puih avang chuahin Isua kan zui thei a ni.