EPIPHANY (Inpuanna) (05.01.2014)

Vincent Zosangliana

Epiphany tih chu inpuanna tihna a ni. Inpuanna chgu enge a awmzia kan tih chuan Pathian hmasanga A zawlneite leh lalte hnena A thu A inhriattir thina khan A Fapa Isua Krista hmangin A rawn inhriattir ta a. Thu chu tisa ah lo changin kan zingah A lo cheng ta a ni. He A rawn inpuanna Epipphany hi khawchhak mifing pathumten an rawn tlawh ni kha a ni a. Heng mifing pathumte hi Judate an ni lova, ringlo mite an ni. Hetianga ringlo mite hnena Arawn inpuanna hian min hriattir a duh chu, Pathian chu Judate tan chauh a ni lova, mi zawng zawng, thiltha duhtute tan a ni tih a rawn lantir a.

Keini ho pawh hi Juda mi kan ni lova, mahse Fapa Isua chuan A Thu hmangin kan hnenah A rawn inpuang ve ta a. Amah chu kan ring a, kan zui ve ta a. A thu hmanga kan hnena rawn Inpuanga khan, “Hmu lova ringtu chu a nihlawh e”, a ti a. Amah hmu lo mahila Engkimtithei, Pathian nung a ni tih kan ring nghet tlat a. Chuvangin, Epiphany kut kan lawm ni hian Pathian kan hnena A rawn inpuanna ni chu kan lawma, Krista Pathian nung ringtu zawng zawngte kut ni pawh a ni nghal a ni.

Kan hnena Fapa hmanga rawn inpuanga chu ringtu kan nih angin, he kan rinna hi nitin a thanglian deuh deuh tur a ni a. Sakrament pasarihte hmangin mifing pathumten an hmuha kha rinnain kan hmu ve a. A thu thianghlim hmangin kan hmu thei bawk a. Abik takin Communion Thianghlim Sakrament ah chuan A Pathianna zawng zawng nen a ngial anganin kan dawng a. He Communion Thianghlimah hian Bethlehem Bawngina lo pianga kha kan dawn avangin zah leh chawimawia, a zing thei ang ber a tlak taka dawng tura beisei kan ni. Kan dawn zin zawh poh leh Amah chu rinnain kan hmu chiang deuh deuh dawna, van kan thlen hunah phei chuan a ropuinas zawng zawnga inthuamin kan la hmu dawn a ni.

Rinna takzet nen Communion thianghlim dawngtu chuan Krista chu a hmu chiang deuh deuh va, hei vang hian khawvel thilte leh tisa chakna tinrengte miin an kalsan phah a, Puithiam, Brother leh Sister ahte tangin an in leh lo, nu leh pa leh unaute, an kalsan ngam hial reng a. Vawiin  niah keini Krista hmutu intite pawh hian Krista kan hmuh chian poh leh khawvel thil min tihnawk theitute kan kalsan ve thei anga. Krista kan hnena rawn inpuanga chu chiang zawka hmu thei turin tihtakzeta kan beih pawh a ngai a ni.

Hlain, “Nang hmututen an lawmzia hi thuin an sawi theilo”, a tih angin, Mithianghlim Paula rualin khawvel tisa chakna leh nawmnate hi “Hnawmhneah lek” kan ngai ve thei dawn a. Chuvangin, hmana mifing pathum, Gentailte hnena Inpuanga kha ka hnenah a rawn inpuang ve tawh em? Ka hnena a rawn inpuan ve theihnan khawchhak mifing pathumte ang khan harsatna kawng thui tak kan paltlang a ngai a. A nuamchinah leh kan hun remchang neihah chauh Amah zui tum lovin, miin an ngaihsakloh lai leh kan buai leh kan thatho loh lai pawhin Krista zawngtu i ni zel ang u.