HLIMNA THURUK (16.02.2014)

  -Vincent Zosangliana

Vawiin kan Pathin thuchhiar ten min rawn hrilh an duh chu: Thuchhiar 1-na, “Thu pek te zawm chu nagma duhthlanna a ni e”. tiin min rawn hrilh a. Chanchintha-ah kan Lalpa Isua’n, ‘dan leh thu zawlneite thu tiboral tura lo kal ka ni lova, ti famkim tura lo kal ka ni zawk’ a ti a. Chu tianga dan thu te zawm tu chuan thuchhiar 2-na ah Tirhkoh Paula’n an chantur a sawi chu: ‘ Mita hmuhloh, Benga hriatngailoh, Mihring ngaihtuahna pawha awmngailo, Lalpa’n A mah hmangaihtute tana a buatsaih chu an chang ang’ a ti a.

Kan Pi leh Pu te hun lai atang tawhin hnamtin leh Sakhaw tinin an lo zirtir thin chu Mihringte inhmangaih tlanga, hlim taka chengho turin min zirtir vek a. Kan Mizo pi pu te hun laiin lal leh roreltute pawhin an khawtlangah rethei ber atanga hausa ber te pawh inhmangaih tlanga, tumah in enhrang lova, tanpui ngai apiang an intanpui tawn thin a. Ei leh In kawngah pawh ei bik leh tlai bik nih tum lovin sem sem dam dam nun inziririn, ‘ Kei Kei Kei ’ tih aiin ‘Nang Nang Nang’ an inti thin a. He nun hi HMANGAIHNA  Kan Lalpa’n min rawn zirtir chu a ni a. Chuvangin, Dan leh zawlneite thu tiboral tura lo kal anih loh avangin kan mizo Pi leh Pu te’n dan thu an lo in zirtir thin pawh ti famkim turin a lo kal a. A mah kan Lalpa ngei chuan mi zawng zawng thih ai a thi a. ‘ Mi in a thian aia nunna a hlan aia hmangaihna nasa a awm lo’ a ti hial a. He kan Pi leh Pu te hun lai atanga kan Lalpa Isua’n min rawn zirtir hmangaihna dodaltu lian ber chu MAHNI HMASIALNA  a ni. Mahni Hmasialna chuan midangte chan tur lak sak a duh a, nang nang nang tih aiah kei kei kei tih chu a nun pui a, mite hmangaihna dan bawhchhia in mahni hmasialna chu a nunpui zawk a ni. Mahni hmasialna chu sual tinreng bul a nih a, Zu leh ruihhlo miin an duhna chhan pawh midangte hmangaihna bawhchhiain inchhunga a chenpuite leh midangte aia hlimna chanbik a duh vang a ni. Chutiang bawkin mipat hmeichhiatna (Sex) lama mi awmmawhte pawhin midangte chhiatna leh rilru natna lam ngaihtuah lovin mahnia hlimna leh nawm chenna a zawn lutuk vang a ni fo thin. Mahnia hlim bik kan tumna hian mite pawi a sawi fo thin.

Vawiin kan Pathianthu ten min rawn zirtir ber chu Pathian Thusawmpek bakah khawtlang dante, Pawl ho dan te leh inkaihhruaina leh Kohhran Inzirtirnate kan zawm hian engmah kan hlauh lova kan hlawkpui zawk a ni. Hetiangte kan zawm hian hlimna thuruk chu kan nei a. Heihian kan nun a hruaina chu, Tirhkoh Paula thusawi, “Mitin a hmuh ngailoh, Bengin a hriat ngailoh, Ngaihtuahna pawhin a suangtuah phak ngailoh Lalpa’n a hmangaihte tana a buatsaihah chuan kan cheng ve thin a ni”.