HMANGAIHNA (23.02.2014)

  -Vincent Zosangliana

Pathianin atirah thupek pakhat a siam a, ‘hmangaihna’ chu. Eden huanah thilsiam zawng zawngin an zawm a, hlim takin an chengza tlang a ni. Mihring chu suala a tluk hnuin hmangaihnaah a nun a hman leh theihnan Pathianin Mosia hnenah Thupek sawm a pe a, hei hi hmangaihna a taka a nunpui theihnan a ni. Mihringin hma a lo sawn a, a lo fing deuh deuhva, he thupek pawh hi a hrulah a siam belh zel a, Isua Khawvela a lo kal lai pawh khan Judate’n he thupek hi zaruk chuang lai a lo siam belh tawh a ni. Nang leh kei pawh hian mite tan chuan thupek fahrah te te kan siam belh tam em em a ni. Mi nundan tur leh awmdan tur kan ruahman sak \euh \euh a; mahni ngei pawhin zawm ngaihna kan hriat loh tur thlengin mi awmdan tur ral a khatah kan rel sak vak vak \hin a ni. Dan siam chu kan thiam \heuh, kan zawm thiamlo erawh hi chu kan inenlet a ngai a ni.

Chuvang tak chuan Isua hnenah Judate Law College-a an zirtirtuin, eng dang ber nge pawimawh tih pawh a hre seng bik tawhlo a ni ngei ang, “Chatuan nunna kan neih nan enge ka tih tur?” tiin a zawt a. Isua’n, “Enge danah inziak kha?” tiin a zawt let a. Chu pa chuan Mosia dan nanana chu a hre hneh hle mai, a chhang dik chiah mai reng a ni. Mahse mahni chan \hatna ngaihtuah ranin, “Tute nge ka vengte chu?” tiin a zawt nawn leh a, Isua’n chhan pahin thiamna leh hriatna aiin mihring thinlunga Eden huan a\anga thilsiam zawng zawng ten an lo nunpui a, an lo zawm tawh chu a pawimawh zawk tih lan fiahtirnan Hmangaihna awmzia chu a hrilhfiah ta a ni.

Chuvangin, chhandamna atan thiamna leh finnate aiin Pathian leh kan Mihringpuite kan hmangaih em tih chu a pawimawh ber a ni reng a, he mi atan hian zir san a ngailo. Kan Pi leh Pu te’n ziak leh chhiar an thiam hma leh, Isua Krista an hriat hmain Isua Krista zirtirna hi a takin an lo nunpui daih tawh a ni. “Nangmah i in hmangaih angin i vengte hmangaih rawh” tih chu mimal leh vantlangin a takin an lo nei tawh a, “Lampui changkhatah tumah biak chhiat loh tur.” an ti a, hmangaihna bawhchhia a mi pawisawi an hlau em em a ni. ‘Kalkawnga mi tupawh i tawh te chu i be chhe tur a ni lo’ an tihna a ni. Hei hian kan \henawmte chu a huam nghal vek a ni. An vantlang nunah pawh khaw chhungah mi harsa bik an awmin an inpui dial dial a, Lo vat zo har bik an awmin an inpui a, Ei leh bar harsatna kawngah buh an inhak a, \anpuina dawngtu nih aiin \anpuitu nih an chak hliah hliah emaw tih turin an inpe phal tak meuh meuh a ni. Hmeithai leh Pachhiate an dawmkang a, khaw chhunga mi harsa bikte an in\anpui tlang \hin.

Chutiang nun chu tunlai, keini Kristiante hian Pathian ringtu intite hian a takin nunpui ve thei i la aw..! Kristian nilote kha chuan an zawm thei a sin mawle. Tunah hi chuan mahni hma hui vum a, chhekkhawl dan lam ngawt kan ngaihtuah a, mi hmaa mi pawh va hui \hen sak kan pawi tilo mai ni lovin; retheite chanai pawh puih ahnekin kan laksak duh ta zawng a ni a le!! Mahni inhmangaih anga vengte hmangaih tur tih thupek pawh hi siam\hat mai zawk tur em ni ang? Dan siamthiam deuhte kan awm mai law’m ni? Chhandamna atan pawh Kohhran pakhat chauh a siam laiin, mihring saim te pawh \ha ve ta angah kan pawm thei mai a ni lawm ni? Chatuan nunna nge kan zawn, khawvela tisa nawmna? Pathian kan rinnaah hian a short cut lam a awmlo a sin! Hmangaihna hi Kristian thurin ropui ber leh thupui ber a nih angin kan nitin zirlai pawimawh ber lo ni reng rawh se.