-Rev. Fr. Denis Lalfela sdb
Kamkeuna: Isua Krista puithiamna, lalna leh zawlnei nihna chu Baptisma hmanga pek ve kan ni a. He nihna ropui tak hi nitin puangchhuak tura koh kan ni. Tirhkoh Paula chuan Timothe-a hnenah ‘Nang erawh chu engkimah fimkhur la, hrehawm tuar la, Chanchin |ha hriltu lam hna thawk la, i rawngbawlna kha hlen rawh’ (2 Timothea 4:5) tiin fuihna thu a ziak a. Diocese chhunga rawngbawlna hrang hrangah hmasawnna kan hmu chho zel a, thilpek rawngbawlnaah pawh ringtute kan harh thar hle niin a lang. Hetianga hmalakna leh thahnemngaihna hi Pathian Thlarauvin a chhem alh tur a ni ang. Chu chhem alh nun chu hlawhtlinna thurûk a ni. Lal Isuan ‘Tinungtu chu Thlarau a ni’(Johana 6:63) a lo ti si a. Tu rawng nge kan bawl ang ? Vatican Council pahnihna chuan ‘Kohhran chu a nihphungah missionary a ni’ (Ad Gentes 2) a lo ti bur mai. Zirtirten an vahvaihpui Krista chhandamna Chanchin |ha chu Kohhranin huaisen takin a puang zel a. Tihduhdahna ramah pawh a hnungtawlh chuang lo. He Chanchin Tha puangtu kan nihna hi a lal ber tur a ni.
Pope Francis chuan Chanchin |ha an puannaah ringtute chu zahngaihna nasa tak lantir turin a chah lawm lawm a. Berampute pawh an beramte rim nam turin a chah bawk a. Chanchin |ha aia mahni indah lal a thiang lo va. Tin, mahni hnam leh chindan, sum leh pai, lalna leh ropuina, inlak bingna leh politics bawlhhlawh takte chu Chanchin Tha hian a hneh ang a, Kohhranah inunauna leh inhmangaihna dik a tuh tur a ni. Ram kan lak loh chuan kan nihna kan chiang tawk lo a ni thei a, miten kan nunah eitur an hmu hlawl lo a ni thei bawk a. Tin, Chanchin |ha aiin khawvel leh a ropuina kan ûm lua deuh a ni thei bawk ang.
Mitin inbihchian kan ngai a, inenletna nun hian insiam\hatna a siam a. Insiam\hat duhna chuan tuihâlna a siam a, tuihâlte chu thlaraua chhun khah an ni ang. Thianghlimna nun kan nei tur a ni: Mathaia 5:8 ah ‘Thinlunga thianghlimte chu an eng a thawl e, Pathian an la hmu dawn si a’a ti a, Lal Isua zirtirna kan hmu a. Thih hnu chauha Pathian hmu tur kan ni lo vang. Ni tinin kan velah Pathian a inlar reng a. Chu Pathian min chenchilhna chu hrethiama dawngsawng turin thinlung thianghlim kan mamawh a. Thinlung a thianghlim tawk loh chuan eng rawngbawlna mah a kal thui thei lo va, rah tha a chhuah teh chiam thei lo. Kohhrana chanvo neite kan fimkhur lehzual a ngai ang. Kohhranin mawhphurhna min pekte hi ‘Lal ngai lo lal a nâ, an lal a khâ’ tih ang mai ni lova khawngaih rawngbawlna a ni tih kan hriat a pawimawh hle ang. Thlarau kaihhruaina leh chhanchhuahna hna hi a hahthlak a. A phûr phûrina tih theih lah a ni hek lo. A hman hmanin pawngpaw tih chi lah a ni dêr si lo. Lan mawi tumna leh NGO te kalphung ang chauha Kohhran kaihhruai tumte hi a hahthlâk a, rawngbawlna awmzia hre tana thil tih chi hauh loh a ni.
He thianghlimna hi kan dah lal erawh chuan rawngbawlnaten rah chhuah thut lo mah se, rah tlo tak a chhuah dawn a, a thawktute pawh hlimnain an khat ang. Thianghlimna nun dah lalna Kohhran chu sawi tam ngai lovin an hlim a, lên luh a nuam a, thlarau a leng a, inelrelna a bo va, Inremlehna Sakramen an pan ngun a, Setanan hmun a chang \ha hman ngai lo. Kohhrana buaina awm ve thinte pawh hi ngun takin bih chiang ila chuan kan thianghlim tawk loh vang a ni fo awm e. Rawngbawlna chu tawngtainain a chawm tur a ni: Rawngbawlna dik leh nung chu \awng\ainain a chhêm alh tur a ni.
No comments:
Post a Comment