ISUA ZUITU (26.01.2014)

  -Vincent Zosangliana

Vawikhat Baptisma changa Kristian nih ngawt chu a tawk lo. Isuan Apostolte leh vawiina kei ni ho zawng zawng hi “Mi zui rawh u” a ti a. Isuan min sawmna chu a hmasa berah Baptisma hmangin kan chhanga; Baptisma kan chan ni atangin nitin kan dam chhungin Isua zuitu nun chu kan nunah kan lantir angai a. Vanram pana zinkawng zawh mek kan nihna chu nitin hmalam panin, hmasawn zel tur kan ni. Hmasawn zel turin kan nitin nunah kan neihreng tur chu thil pathum a awm: (1) Eng (2) Hlimna (3)Zalenna te hi a ni.

1. ENG: Midangte nen, chhungkua leh thenawm khawvengah nun Eng mite hmuh theihin kan lantir reng a ngai. He nun eng hi midangte nen a chengho kan nih angin thatna te, felna te, midangte tana entawntlak nun chi hrang hrang kan nun-ah kan lanchhuah tir a pawimawh a. Hetiang nun hi kan lanchhuah tir theihloh nan Setana’n chawl lovin englai pawhin min beireng tih kan hriatreng a tul. Sual leh nun mawilo kan tihloh tur thil kan tih thin hian Nun thim, Eng neilo kan lantir thin. Hemi laka inveng turin chakna kan neilo, Tawngtaiin Pathian hnenah chakna kan dil reng tur a ni. Isua ngei pawh khan midangte tan a nun a hman tam poh leh A mahah chakna awmte a hmang zo va, fianrialah a Pa hnenah chakna dilin a tawngtai thin.

2. HLIMNA: Kan Tawngtai tam poh leh sual tura thlemna kan do hneh thei a, kan nun a hlim nge nge thin. Sual a kan awmin kan nun a hlim lo, rilru hahna leh thaw ipikna kan ngah a, kan nun a ngui in tisa thil tak pawhin kan chauin kan nun a beidawng thin. Miin nun kawngdik a zawh a, mite entawn tlak nun a neihin a nun pawh a hlim thin a ni.

3. ZALENNA: Sual leh thil thalo kan tih apiangin  keima nun a zalen lova, keimah pawh ka inning a, midangte nen zalen taka nun inpawhna kan nei lova, hlauh leh venthawn kan ngah a, mite zingah zalen leh hlim taka chenho harsa kan ti thin. Hlauh leh dawizepna ten kan nun a tuam vel thin.

Kristian dik nuna kan nunin kan nun a zalenin a hlima, taksa leh thlarauah a hrisela, kan nun pawh a engthawl thin. Hetiang nun kan neih theihnan leh heng lakah kan fihlim a nun zalen nei turin nitin Krista chhandamna leh a tihdamna (Redemptive Healing). Kan mamawh ngawih ngawih avangin Tawngtaina leh Sakramen te nen Pathian hnen atangin chakna kan dawn angai fo thin.

Chuvangin, Isuan Amah zui tura min sawmna hi vawikhata hlen maitheih a ni lova, Nitin tha thlah lova bei fan fan reng tur kan ni a. Hetianga tha kan thlah zeuh chuan Setan an min rawn hneh a, kan nun a chauvin a ngui thin. Pathian Lal rama cheng turin englai pawhin Eng leh Hlimna leh Zalenna te nei tur hian kan nunah Indona bei reng kan nihna hi hriain fimkhur takin nun i hmang zel ang u.