- Fr. Denis Lalfela SDB
Sâm ziaktu chuan “Engkim thaw thei tawh phawt chuan Lalpa chu fak rawh se. Lalpa chu fak rawh u” (Sam 150:6) tiin Pathian fak turin min zirtir a. Pathian fak \hatzia leh chu faknaina kan nun a kaihhruai dan kan thlir ho dawn a ni. Fakna hi Pathian min hnaihtirtu leh A malsawmna min auh thlaktirtu a ni. Phunnawi lova Pathian fak tura koh kan ni a, lawm zelna nun hi hlimna rahbi pakhat a ni. “Kei zawng eng ang pawhin awm mah ila, lungawi zel ka ching ta” (Philipi 4:11) tiin Paula chuan Kristaah lungawina famkim a hmuh thu a sawi a. Hun kal tawhah natna tam tak kan nei ang, min tinatu leh kan tihnat vete pawh an tam ang. “A vuakna vualtea tihdamin kan awm ta” tia zawlnei Isaian damna min lo puansak tawh ang khan Krista hnungzuitute leh Ama mihriatte chuan Kristaah chauh damna famkim kan chang ang.
PATHIAN FAKNA LEH KAN CHAKLOHNATE: Pathian faktute hi harsatna tlanbosan, midawihzep an ni lo. Pathian hi kan harsatna aia A ropui zawk avangin kan beiseiin a êng lam kan thlir mai zawk a ni. Pathianin kan harsatnate hi A chingfel thei a ni tih kan ring a. A hmangaihnain kan nun a tihkhah chuan kan chak lohna hneh turin tumna leh thiltihtheihna kan lo nei dawn a ni. Nun insiam\hatna hi kan chak lohna beih vak vakah a innghat ber lo va. Isua Krista beiseina nena en te, A hmangaihnaa inchâwm te leh hlau hauh lova rinnaa ke pen hi insiam\hatna rahbi a ni.
Naupangin a nu leh pa a rin anga Pathian kan rin ngam hunah kan harsatnaahte Pathianin thu a nei thar leh ang. Kan duh ber chu Krista a nih tlat chuan chhungrilah zawi zawia tihdanglam kan ni zel ang. Chhel taka Krista kan zawnnate leh Amah ngeiin min khawihnate chu min tidanglamtu a lo ni fo dawn a ni. Johana bung 4-a kan hmuh angin, Samari hmeichhia pawh khan Lal Isua a hmu a, a ngaithla a, Lalpa a rinna leh Lalpan a hmangaih avanga nunthar pek a ni. Ringtute hian duhthlanna siam tur kan nei fo va. A chang chuan a \ha ber kan thlang ngam lo. Chuvangin min tlantu Kraws en reng chunga kan ni tin nun kan hmachhawn a tul a. Thlarauvin kan kawng a tiêng zel ang.
Simon Petera pawh kha Pathian khawngaihna a chunga leih buak chuan nasa takin a sawi danglam a, a Lalpa hmangaihnain a hneh hlawm tawp kan ti thei ang. Hmangaihnaa rawngbawl tur a nihzia a chian ve leh Petera chuan rinawm taka rawngbawl turin ke a pen a. Harsatna leh thlemna a hmachhawn hmiah hmiah a. Lalpa anga khenbeh tlakah a inngai ve lo va, a letling zawnga khenbeh a ni nghe nghe nia sawi a ni. A ni tak a, sual simna leh intuaitharna lam ngaihtuah aiin mahni chak lohna ngaihtuahin hun kan hmang a. Hun kal tawhin min tinâ a, min thunun a, hmasawn ahnêkin ngai kan awh zo mang lo \hin a ni. Heng kan harsatnaahte hian Lal Isua sawm nachang hre \hin ila, a khawngaihnain Anin min lo thuam dawn a ni. Mitdel pakhat anga “Lalpa, hmuh ve ka duh e” tih rilru puin, Pathian hnenah kir \heuh ila. Ani chuan kan theih bak pawh min tihsak vek ang. Ani chuan Thlarau finna min pe ang a, zawi zawiin a zirtir rinawmah min siam ang. He zinkawnga kan mamawh lian ber chu amaha inghah ngamna, dawhtheihna leh inngaihtlawmna a ni.
No comments:
Post a Comment