KA THLARAU THO LA HLIM TAKIN -2 (18.05.2014)

- Fr. Denis Lalfela SDB

(Karhmasa Article zawmna............)

Tirhkohte Thiltih bung 16-a kan hmuh angin, Tirhkoh Paula leh Sila chu Phillipi khuaah dik lo takin tân in (jail) ah an tantir a, an vaw hrep bawk a. An tlanbo theih loh nan thingkawl an buntir a. Eng chen nge an tan ang a, an nunna an chân dawn em tih pawh an hre hek lo. Pathian laka vui chiâm a, beidawnnaa tluk luh mai a va awl dawn em! Paula leh Sila chuan tân inah Pathian an fak thu leh chhel taka an \awng\ai thu min hrilh tlat mai. Zanlaiah lir a nghing a, tan in kawngka a lo inhawng ta thuai a. Jail vengtu mangang chuan intihhlum hial a duh ta a. Paula chuan, “Engmah intih suh; kan zain hetah kan la awm vek alawm” tiin a au va. Chu faknain thilmak a tih chu tân in kawngka vengtu hian mit ngeiin a hmu a, a haider ngam tlat lo. Tichuan Paula leh Sila hnenah, “Pute u, chhandama awm turin enge ka tih tur?” tiin a zawt ta hlawl mai a. Tin, anni chuan “Lalpa Isua ring la, tichuan chhandamin i awm ang, nang leh i chhungte nen” tiin an chhang a. Kristian chhungkua an din ta a ni. Harsatna leh thlemna kara Lalpa faktute hi hnehna changtute an lo ni thin. Hmelmapa Setana tihtlawm a nih theih nân hun harsaah pawh Pathian fak mawlh mawlh a \ul a. Fakna hian Setana lalna a dodal a, a umbo \hin a ni.

Divine Retreat Centre, Kerala-a speaker pakhat pawhin, “Kan nuna harsatna tam tak hi chu Pathian kan fak tawk loh vang a ni” a ti a. A dik hmel ngawt mai. Pathian hian fak mawlh mawlh a phu a, amah kan fak apiangin kan chhungrilah sual hneh theihna a lo lian zel a, Setanan hmun a chang tlem tial tial a, kan tawngkam pawhin khawngaihna lam a hawi ta thin a ni. Luka bung 19-ah Lal Isua ropui taka Jerusalem a luh thu kan hmu a. Mipui lo aute chu Pharisai inphumrute chuan an ning ta tlat pek a, khapbet turin Isua an ngen a. Isua erawh chuan “Ka hrilh a che u, hengte hi an ngawih reng chuan lungte tal an au chhuak tur a ni” tiin amah chu kan fak tur a nihzia huai takin a sawi a. Pianken kim ve biai, inkhawm tlut tlut, Kohhran tana thilphal tak, rinnaa nghet fu si, Pathian fak thei tlat lo ringtu kan ni ang tih a va hlauhawm em! Kohhranah erawh mi hlimna ngaithei lo, mi hlim hmel hmu thei lo, ropuina leh lalna uma Pharisai an inphumru lo turah i beisei phawt teh ang.

Pope Francis chuan April 24, 2013-a mipui zirtirna a peknaah “Kristian chu a hlim tur a ni” a ti a. Hlimna chu inkaichhawn awlsam tak a nih avangin Pope hian ringtute chu hlim reng turin a chah fo thin a. Philipi bung 4:4 ah, Tirhkoh Paula chuan “Lalpaah chuan lawm fo rawh u: ka ti leh pek thin ang, lawm reng rawh u” tiin Kristiante a zirtir a. Lawm fo hi chu a har vak awm love, lawm reng hi kan tum zawk tur a chu a ni. Hlain “Krista hmangaihtuten lungawina leh muanna chu an chang” a lo tih diam tawh angin Krista hmangaihnaa chhun khah nun neitu tak tak chu lawm reng theihna sikulah a kal mek tihna a ni a, a zirtirtu chu Isua a ni. Pathian fak leh hlimna nun hi evangelization ah pawh hmanraw tangkai tak tur a ni. Miten kan hmelah Krista hmuh an beisei thin a. Thlarau chenchilh loh ni awm fahran hmel thim ruap mai ai chuan Krista an neih avanga hmel hlim pu tlat a, a thalam thlira beiseina nung neitute chu Kohhranin a mamawh a ni.

A THO LEH TA, HLIMIN ZAI R’U:

Kan tana a thawhleh avangin hlimin i zai ang u. Min chhamdamtu Krista zarah ropuia ngamtu kan ni zel tawh ang. Mathaia 27:46 ah, “Ka Pathian, ka Pathian, engah nge mi kalsan?” tiin mangang leh mal inti takin Isuan a Pa a zawt a. Isuan chhanna a hmu mai lo. Hmangaih Pathian kan tih fo lai hian damlohna nasa tak te, harsatna khirh tak te, accident te, phatsanna te, hekna te, bumna te, retheihna te leh thihna te kan tawh changin Isua ang hian Pathian kan zawt vekin a rinawm. He Pathian ropui tak ngawih rengna hi a mak a, hriatthiam a har a, kan na vawng vawng thin a ni. Mathaia bung 28 ah, ‘Tin, vantirhkoh chuan hmeichhiate chu a bia a, an hnenah, “Nangni chuan hlau suh u. Isua an khenbeha kha, in zawng tih ka hria e. Hetah a awm tawh love, a sawi ang ngeiin a thawhleh tawh kha” tih ziak a ni. A Fapa Isua Krista, thihna ata a kaihthawh lehna hi Pathianin a Fapa a chhanna chu a ni. Pathianin khawvel a hmangaihna famkim chu Krista tuarna, thihna leh thawhlehnaah kan hmu a. Nang leh kei min tlan nana a Fapa pawh ui lotu Pathian hian kan hriatthiam aia nasa hian min hmangaih a, engti angin nge he hmangaihna hi kan chhanlet ve dawn le?

A thawhleh hnuah Isua chu a zirtirte hnenah a inlar a, “Thlarau Thianghlim nei rawh u. Tu sual pawh in ngaihdam apiang ngaihdam a ni ang; tu sual pawh in ngaihdam loh apiang ngaihdam loh a ni ang” (Johana 20:23) tiin Thlarau Thianghlim a pe a. Sual ngaihdam theihna thu a pe bawk a. Kan va vannei tehlul em! Inremlehna Sakramenah Isuan a nghak reng che. Inpuahchah la, Easter bawr velah tal Kohhranin sual puang tura min zirtirna kha! Petera aiawhtu, Krista palai, Pope Francis chuan Rome-ah Inremlehna Sakramen buatsaihin amah ngei pawh sualpuanna ngaithlain a thu a, he Sakramen hmanga Krista ngaihdamna chang turin ringtute a sawm thar leh a ni. Rome khawpuia puithiam za tam tak pawh Hapta Thianghlimah hian Italy parish hrang hrangah Krista ngaihdamna palai ni turin kan fehchhuak thin a. Kar khat chhung deuh thaw zing dar 8 atangin zan dar 7 thleng confession kan ngaithla thin a. Experience ropui tak a ni a, mihring chak lovin mihring chak lo ve bawk, Krista avangin a tanpui a, a fuih a, a hnem a, a ngaidam a! Ngaihdamna changtu lah “Ka sual zawng zawng aman min tlak sak” ti ang maiin a hlim em em a, zalen takin Pathian a fak thei ta thin a. Hei hi puithiamte lawmna a ni. Krista palai nih hi kan tlin leh fel vang a ni ngai dawn lo. Easter hlimawm hmang thei turin sual tlenfaina i pan ang u. Sualin ro a rel chuan Pathian kan fak thei lo. Hawh u, Lalpa ngaihdamna par i tlân mawlh ang u. “Ka thlarau tho la hlim takin, i chhandamtu fakin zai rawh” tiin lawmna leh thinlung thar nen Easter i hmang teh ang.