KOH KAN NI (16.03.2014)

-Vincent Zosangliana

Vawiin Lent hun chhunga Pathianni vawi 2-na ni a kan thupui chu ‘KOH KAN NI’ tih hi a ni. Thuchhiar 1-na ah Pathianin Abrama a kohna kan ngaithla a (Gen 12:1-4 ). Pathianin Abrama a koh khan, “I in leh lo leh i nu leh pa leh i laichinte kalsan la, ram ka la entirtur che lam chu pan la, hnam ropui takah ka siam ang chia, mal ka sawm ang chia, hmingthang takin ka siam ang che” a ti a. Pathianin a koh angin Abrama chuan Pathian a ringa, a kalchhuak nghal mai a. A nu leh pa, a laichinte engchena rei nge a kalsan anga, khawilamah nge a kal dawn tih pawh a hre lo. Pathian a ringa, Pathianin, “Mal ka sawm ang che” a tihah chuan a innghat ngam a ni.
 

Abrama ang bawkin Pathianin Isua a kova, a ropuina vanin nuam kalsan turin a kova, he leiah mihringte min rawn chhandama, a nunna meuh hlan turin a ko tih kan hria a. Isua pawhin Pathian kohna chhangin a awmna hlui leh a ropuina zawng zawng kalsanin he lei hrehawmah a lokal a, a nunna meuh a hlan hnuah lei leh vana rorel turin Pa Pathian dinglamah a han \hu ta a.
 

Abrama leh Isua te’n Pathian kohna an chhan hnu khan an chungah enge lo thleng zel? Pathianin a tiam ang ngeiin ropuina an chang tih kan hmu a ni. Keini pawh khawvelmi nihna ata Pathianin A ma mite atan min kova, kan rinawm chhun zawm zel em? Abrama chhuahsan ram lamah let leh a tum tawh lo. Iusan a tih tur, Pathianina a ruat chu harsa mahse bansan a tum lo, a hma a ropuina awm chu thlirin thih thlengin Pathian kohna a chhang a ni. Isua’n zirtir tamtak a nei, Apostol-te pawh sawmpahnih lai an  ni. Sawmpahnihte zing atang khan harsatna tlangsang thlenga Isua zuia a ropuina hmutute erawh pathum chauh an ni. A ropuina hmutute erawh chuan a nawmzia leh a thlamuanthlak zia an hmu a, chumi hmunah chuan bawkte khawha awmngheh mai an duh a ni.
 

Pathianin min kohna chu kan chhangta a, van khua leh tuiah min siamta a , chu Pathian mithianghlimte kan nihna ang chuan kan la rinawm reng em? tih  hi he LENT hun chhung hian mimal tinte kan inenfiahna hun atan Kohhran in min siam sak a ni. Koh kan nih anga kan inenfiahna tur chu THIANGHLIMNA NUN kan nei takmeuh em? tih hi a ni. Pathian mithianghlimte kan nih angin kan tihloh tur kan ti em? kan tih tur kan ti em? tih hi a ni a. Chuvangin, Taksa leh Thlarauah kan thianghlimna tibawrhbang thei ang zawnga kan nun kan lo hman tawhnate insiamthara simna nun nen kan chhandamna, sual vanga kan hlohte nei kir leh turin ringtu mimal tin te min sawm a ni.
 

Krista ang deuh deuh tura nitin nun insiamthara, nitin nunah danglamna neih chu thil awlai a ni hauh lo. Kalsan tur tamtak kan nei \heuh, Isuan a Pa duh ang rawn tih hlawhtlin chu harsa a ti tak meuh a, a thlan Thisena luang hial khawpin hreawm a ti. Abrahama’n ram tiam, nun hlimna leh hlawk zawka nunna ram a pan khan harsatna leh hreawmna tamtak a paltlang, chuti chung chuan harsatna karah pawh a hma-a ropuina leh hlawkna awm avang chuan a beidawng chuang lo. Kan nuna kalsan tur kan neih kalsan hian engmah kan hloh lo, kan hlawk zawk a ni tih hriain, kalsan ngam nun nei turin Pathianin min kohna lam chu huaisen takin i pan zel ang u.