KRISTA HMANGAIHNA LEH KAN DUHTHLANNA (14.09.2014)

- Fr. Denis Lalfela sdb

Pathianin min hmangaihna vawr tawp chu Kraws-ah puanchhuah a ni. A vuakna vuala tihdam kan ni ta! Kan Lalpa Isua hmangaihna chu min tidamtu leh Pathian fa nihna min petu a ni. Isua rawngbawlna kha a lo lawmtute tan taksa leh thlarau damna a ni fo thin a. Tidam thei hmangaihna nena rawngbawl hi a chaw tui ber a ni. Galili rama rawngbawlna a tan dawn khan Pathian Thlarau Thianghlima hriakthih a nihzia a puang a nih kha (Luka 4:18-19). Isua project ah chuan mi tin tan hmun a awm. Khawtlanga mi tlaktlai lo, eiru thin nia an ngaih Matthaia leh Zakaia te pawh ngaihdam an nih bakah chawisan an ni. 

Lalpa ngaihdamna kan chan apiangin chawisanin kan awm thin. Hmangaihna nena rawngbawlna chuan misual ber pawh a thleng phak ang. Mi tin zalen taka an lenluh ngamna Kohhran kan ni em tih hi kan tehfung ni sela, kan rawngbawlnate hian beramte a huikhawm tur a ni. Mi tha ni a inngaite chauh inkhawmna tura Biakin hi sak a hi awm der si lo. Biakin hlat deuh leh mi sual ni a kan hriatte hian kan inchhir loh chuan Lal Isua thusawi, “Chhiahkhawntute leh nawhchizuarte chuan Pathian ramah an luh khalh dawn che u a nih hi” (Mathaia 21:31) tih hi kan chan tur a ni ang tih a hlauhawm hle mai.
    Pathian hmangaihna chuan ui a nei lova, a fapa neih chhun min pe tawh a. Chuti chung chuan chu a hmangaihna chhanletna chu kan duhthlannaah a la dah cheu a ni. Tumahin tihluihna avanga hmangaih nih kan chak awm love. Pathian pawh hian min tilui phal lova, duh taka a siam, taksa leh thlarau a pek hringfate atang hian hmangaihna tluan tling, tihluihna tel lo a duh tlat a. Hei hi Pathian ropuina a ni. A fapa pawh ui lova min tlan nana tirtu chuan mi zawng zawng hi amah hmangaih tur hian min tilui mai se ni awm tak a ni. Mahse tihluihna avanga hmangaihna chu hmangaihna a tling tak tak lo a ni.
 

Duh thlang thei tura zalenna min pek avangin thil tha leh tha lo an in do ta reng a. Sual chu a tirhah tha tak leh nuam takin a inpuang a, mi a hip a, tih mai a chakawm a, ringtute kan tlu ta thin a ni. Thil tha erawh a tlo a, a chang chuan a inthup a, a muang a, chawimawi a hlawh lo fova, chuvangin thlan har kan ti thin a ni. Kan ngaihtuah chuan erawh chuan thil tha ti tura tha tam tak kan seng ang tho hian thil sual ti tur pawh hian hun leh tha kan seng teuh tho mai. Sual kawng chu thihna a ni a, tawp chin a nei a, a tlo ngai lo. Thil tha chu a tlo a, chu kawng chuan Pathian hnenah min hruai a, nunna kan hmu thin.
 

Nunna tuikhur kang ve ngai lo chu kan Pathian ta a ni. Thil kan tih apiangin kan hlim a, sual a lo tlawm a, midang tana ei tur ni thei khawpin thlarauah hma kan sawn dawn a ni. Thil tha ti tur hian Lalpan I thinlung kawngka a kik reng a ni. Khawvelah hlimna kan zawng theuh a; sum leh pai, sex leh nawmsip bawlna, eirukna leh politics bawlhhlawh, zu leh drugs, rei dah lo nawmna leh hausakna ten ringtute min chimbuai a. Ringtu puitling kan nihna chu kan duhthlannaah a innghat tlat a ni. Thil tha i thlan apiangin puitlin lam kan pan a lo ni reng mai.
 

Lalpan a kaihhruaina che avangin lawmthu i sawi ngai em ? A kohnaah che hian lawm la, a hmangaih che avanga nang thlangtu che hian i mamawh a hre vek asin! I chaklohna, I harsatna leh manganna pawh a hre vek. Tidamthei hmangaihna tlangaupuitu i nih theih nan kawng chhuk chho tak hmangin a chher hriam thin mai zawk che a ni. Lalpan a dahna che hi a tha tawk a, amah nen hma i sawn thei a. Amah nen thlarau tam tak i tidam thei a, ama zarah hneh theih loh nun chu i nei bawk ang. Kan tlinloh leh fellohna haider a, tidam thei hmangaihnaa min thuam thintu Isua hming chu fakin awm rawh se.