MIDANGTE TAN ENG NI TURIN (19.01.2014)

  Vincent Zosangliana

Kum 2014 a thla hmasa ber, January thla kan hman mek lai hian kumtluana kan nundan tur vawiina kan Pathian thuchhiarte chuan min rawn hrilh a ni. Midangte tan Eng ni turin tih hi a ni. Hlaa kan sak fo thin angin, “Miten min chhiar min thlir reng e, ka awmdan zawng zawng an hai lo”, kan ti thin. Hei hi a dik khawp mai. A ruk tea thil kan tih pawh midangte hriat loh a awm lo. Ka hriatah an sawilo mai a ni ang. Mahse, hmun hranah ka thil thalo tih kha an sawi an sawi thin tih hi kan hriat a pawimawh hle a ni. Chutiang thil tha lo kan tih chuan kan nunah Krista Eng lanchhuah tir aiin thim kan lantir tihna a ni a, Krista mite tih loh tawp tur kan ti tihna a ni ang.

Krista chuan eng ti turin nge min duh? Nun mawi leh nun entawntlaka nung turin min duh a ni. Kan nihna aiin kan nundan tha a pawimawh zawk tih kan hriat fo a pawimawh a, kan Kohhran chhungah kumthara kan hruaitu turte pawh kan inruat leh ta a, hruaitu dinhmuna dingte tan phei chuan Hruaitu ni ngawt lovin miten kan nunah Eng an hmu em? tih hi kan inenfiahna tur nise la... Chutianga nun Eng keimahniah miten an hmuh chuan Isua’n “Hei hi ka mi thlan chu a ni,” a ti ngei ang. Kohhranah te, Khawtlangah te Krista’n A Eng chhuah tirtu atan min duh a, veng chhunga chhiatni thatni ah te kan lang ve thin em? Kohhrana hruaitu kan nih chuan kan nihna aiin kan nundan kan mipui ten min thlir zawk a, chutiangin, Hmeichhe Pawl leh Thalai Pawl ah te, YMA leh hruaitu dinhmuna dingte tan chuan midangte entawntlak nun kan neih a pawimawh hle a, kan bat a ni tih kan hriat pawh a tha khawp mai. Memberte tan pawh kan telna pawlah chuan taimak leh rinawm chu kan bat a ni tih kan hriat thar fo a tha.

Krista chuan mi zawng zawng chhandama an awm theih nan A nun a rawn hlan a, Krista chhandamna chu thawk chhunzawm turin Baptisma hmanga serh hran kan ni tawh a, hei hi kan thusawi leh kan nihna aiin kan nuna lantir chu kan tihmakmawh a ni. Thusawi aiin nundan tha hian mite hnenah thu a sawi ring fe zawk a ni. Chuvangin, Member naran mai pawh ni ila, nundan tha leh mawi; keimahniah miten an hmuh chuan midangte tan Eng kan ni tih hi hrenawn leh ila a va lawmawm dawn em!! Krista Eng chhitu kan nihna hi keimahni nia kan inhriat aiin midangte’n kan nunah rawn hmu thei sela, chutin Krista chhiahhlawh rinawm leh A Eng chhitu kan lo ni dawn a ni. Chuvangin, he kumtharah hian kumtluana midangte tan Eng kan nih theihnan Krista thlarau chuan kan nun min tih thar sak mawlh rawh se.