NUNNA CHHANG ISUA (22.06.2014)

- Vincent Zosangliana

Vawiin hi Isua taksa leh thisen Kût ni ani a, Krista Taksa Eucharist tel lo chuan Kohhran a awm thei lo. “Kei hi Nunna chhang ka ni, ka hnena lo kal chu tumah an ril\am ngai lovang; Mi ringtu chu a tuihal ngai tawp lovang”(Jn 6:35)

He khawvelah hian mihringte hi khawvel thil (Material) te châkin kan tuihal a, kan ril\am a, kan zawnga, kan um a, neih tumin kan intlansiak huai huai a ni. Tihtak zeta zawng tuten an hmu a, an nei \en \un a. Mahse, lungawina leh ril\am/tuihalna a phuhruk thei si lo, a nei ten neih belh zel duhin chintawk leh duhtawk awm lovin kan intlansiakna hi zawh tih a awm thei chuang si lo. Hetiang ang zawnga mihring hi a vah vel laiin Isuan, “Keihi nunna chhang ka ni, ka hnena lokal chu tumah an ril\am ngai lovang; mi ringtu chu a tuihal ngai tawp lovang” a ti a ni. Isuaha chauh kan mamawh a famkimin kan nei thei a, amah chauh chu kan tuihalna leh ril\amna, kan hmuhna chu a ni. eng tuihalna nge? Eng ril\amna nge? Mihringin kan tawrh \hin? Hlimna, Lungawina leh Thlamuanna zawng hian alawm kan tuihal a, kan ril\am \hin chu. “Tupawh miringtu chu a tuihal ngai tawp lovang” a ti a. Isua neitute an tuihal em? Lungawina an hmu em? An lungawia an thlamuan tak zet avangin Paula pawhin, “He khawvel thil awm zawng zawngte chu chânnaah kan ruat vek a” a ti a. Khawvel thila kan ril\amna leh tuihalnate kan chân ngamin, Kristaah chuan tihhausakin kan awm a, chu chu lungawina dik kan hmuhna chu a ni. He khawvela thil awmte hi thil ral mai thei leh chhethei anih avangin Isua’n, “Chaw dangral mai mai um in phe phe suh u”a ti a.(Jn 6:27)

Keista ngei chuan a zirtirna leh a hnen a\anga an kal bo ai chuan, mipuite mamawh chu an dil hma pawhin a pe a, an ril\amna ata tlaina a pe a. Mahse, chung tisa pumpuarna chu buaipui berah nei lovin, chatuana nunna neihna zawk tur, Amah kristaah chuan zawng turin mite a hrilh a. Mosia’n thlalera Mana a pek kha tisa pumpuarna mai ani a, Isua’n chaw tak a pek tur chu chatuana nuna atan a ni a, chu chu Eucharist-a  kan dawn hi a ni. Eucharista Lalpa dawn nge kan ngaihpawihmawh, Mahni tisa pumpuarna? Chaw dangral mai umin em ni kan phet kan phet? Nge chaw tak Eucharist-a Lal Isua hi. Hetah hian kan Lalpa chu a Pathianna zawng zawng nen a awm a, heihi kan buaipui em? Nge Sakhaw thil serh naran maiah kan la ngai?

Isua chu kan ei theih turin Chhangah a rawn insiam a, min luahkhah a duh a. Keimah maia kan awm a phal lova, a Temple kan nih angin keimahni chungah lo chen a duh avangin kan ei theih turin chhang leh Uain hmangin kan chhungah lo chên a duh a ni. Tirhkoh Paula’n a sawi angin, “Tuna ka nung hi keimah ka ni tawh lo, keimah-ah Krista a nung tawh zawk a ni” a tih chiah kha kan chan theihnan chhang ni tawh lovin a Tisa-ah a chantir a, Uain ni tawh lovin a Thisenah a chantir a ni. Chuvangin, Chhang leh Uain kan dawng a ni lo, Lalpa kan dawng tawh zawk a ni. Hei ngeihi a ni, “Nunna Chhang ISUA chu”. Kan Pathian nung ngei dawng tute kan ni hi kan vannei e!!