Ka unau duhtakte u, Easter thianghlim chibai hlimawm tak ka buk vek a che u. Kohhran chuan khawvel pumah angelte’n hmeichhiate hnena thuchah an ken: ”Nangni chuan hlâu suh u. Isua, an khenbeha kha, in zawng tih ka hria e. Hetah A awm tawh lo ve; A sawi ang ngeiin A thawhleh tawh kha. A mutna hmun hi rawn en teh mah u.”(Mt 28:5-6)tih thangkhâwk chu kan hria a.
Hei hi chanchintha vawrtawpna chu a ni. He hun hi a ni kan rinna leh beiseina innghahna laimu ber a chu. Krista kha kaihthawh ni lo se chuan, Kristianna hian a awmzia a hloh dawn a ni; Kohhran thiltihte pawhin a hlutna a hloh vek dawn bawk a, heta tang hian Kohhran chu chawr chhuakin, a thang lian zel a ni si a. Kristiante’n khawvel a thuchah kan ken chu: Isua, hmangaihna avanga mihringa lo chang chu, kan sualna avangin kros-ah A thi a, mahse Pa Pathian chuan kaithoin nunna leh thihna chunga Lalber ah A siam ta. Isua-ah chuan hmangaihna in huatna a hneh a, zahngaihna in sualna, \hatna in chhiatna, dikna in dawt, nunna in thihna a hneh a ni.
Chuvang chuan mi zawng zawng hnenah:”Lo kal la en rawh” kan ti a ni. He mihring nun chhung, chaklohna in a bawm, sualna leh thihna karah hian, Chanchin\ha chu thu mai a nilo, tawpchin neilo hmangaihna rinawm puanchhuahna a ni: keimahni intheihnghilha midangte tana inpekna, damchhung buainate’n a rahbehte hnaiha awm, mi harsa tana inpek, damlote ngaihsak, tar chaklo leh mi ensante zawng zawng hnenah chuan he hmangaihna hmang hian ”Lo kal la en rawh” kan ti a ni: Hmangaihna chu chak lehzualna a ni a, hmangaihna chuan nunna a pe a, hmangaihna chuan beidawnna hmunah pawh beiseina a parvul tir thin si a.
He kan thinlunga lawmna nasa tak nen hian, vawiin-ah I lam kan lo hawi e, Tholeh Lalpa!
Nangmah zawng hmu tur che in, Pa kan nei a fahrah kan ni love tih hre turin min pui la, kan hmangaiha kan fak theih nan che.
Ril\am tuihal buaina hneh thei turin min pui la, buaina leh inrenchem lohna avanga mawh kan phurh thinna ah hian.
|anpui ngaite \anpui thei turin min pui la, abikin naupang, hmeichhia leh tar chaklote, tihduhdah leh thlauhthlâk tuar thinte tân.
Guinea Conakry, Sierra Leone leh Liberia rama Ebola natna avanga tuarte ngaihven turin min pui la, hriatlohna leh retheihna avanga natna dang tamtak darh tuar mekte pawh ngaihven turin min pui bawk ang che.
An hmangaihte nena he Easter hun hmang theilote thlamuan la, diklo taka lakhrante, puithiam leh ringtu khawvel hmun hrang hranga rukbote pawh thlamuan ang che.
Mahni ram atanga raltlan, an hmalam hun atana dikna chanvo leh rinna puanchhuah theih beiseitute chu thlamuan ang che.
Kan ngen a che Aw Lal Isu, indona leh buainate, a lian leh te, hman leh tuna mite pawh ti tawp an che.
A biktakin Syria tan kan tawngtai e, kan hmangaih Syria tan, tualchhung buaina avanga tuartu zawng zawngte’n tanpuina an dawn theih nante, a tu lam ve ve mahin tharum an hman tawh loh a, abikin venghimtu neilo mipuite chungah, huai taka kan nghahhleh em em remna a lo awm nana inbiakna an lo neih zawk nan kan dil e.
Isu, ropuina Lalpa, Iraq rama buaina avanga tuarte chu awmpuia thlamuan turin kan ngen A che, Israel leh Palestine inbiakna pawh a tluan zel nan kan dil bawk e.
Central African Republic-a innghirnghonate, Nigeria rama firfiakte chetna leh South Sudan-a tualchhung buainate a reh theihnan kan ngen e.
Venezuela ramah inunauna leh inremna a lo awm a, an thinlungte a lo inlamlet theihnan kan dil bawk e.
Tun kuma Julian calendar hmangtu Kohhran hrang hrangten I thawhlehna kan lawm azarah hian, Ukraine rama remna a awm theih nana hma la tute chu tanpuiin ngaihtuahna pe la, ram hrang hrangte hmalakna azarah buaina pumpelha, inunauna rilru nen an ram tana kawng an sial theih nan kan ngen e. Vawiin ni ngeiah hian lungrualna leh inunauna rilru nen ‘Krista chu A tho leh ta’ lo ti rawh se, Krystos voskres!
Lalpa, khawvel mi zawng zawng tan kan tawngtai e, Nang thihna hnehtu chuan, nunna min pe la, thlamuanna min hnutchhiah ang che.
Ka unau duhtakte u, Easter chibai vek ule.
No comments:
Post a Comment