PALM SUNDAY (13.04.2014)

-Vincent Zosangliana

Palm sunday chu Isua Jerusalema ropui taka a luhna ni kha a ni a. Martha, Mary leh Lazara te khua Bethani atangin Jerusalem khua temple-ah Lalber a nihna angin a lut a. Hmasang atanga Pathianin rem a lo ruat lawk tawh anih avangin mipui pawhin an lo hmuak ropuiin nasa takin an lo chawimawi a. Tutenge lo chawimawi? A zirtirte, damlo a tihdamte, thilmak a tihlai hmutute leh midang tamtakin an lo hmuak a ni. Keini pawhin kan thinlungte hlanin tihtakzeta chawimawiin anmahni chu i zawm ve ang u.

HOSANNA Lalpa hminga Lal lo kal chu chawimawiin awm rawh se. Israel te Lal chu chawimawiin awm rawh se. A Pa thuawiin, A Pa hminga lo kal chu chawimawiin awm rawh se. Kan chhandamna atan Jerusalema thi tura huaisen taka lut Isua chu chawimawiin awm rawh se.

Johanan hetiangin a sawi a, “Kalhlen kut a hnaih tak avangin Isua chu Kut hmang turin Jerusalem-ah a chho a........mi tamtak an chho ve a............Isua chu khawnge a awm? Man a tihhlum turin an zawng a,  tunge hmu leh a awmna hria an inzawt sup sup a”(Jn 7:11). Chutichung chuan indona a hnehtu hnehna changa lo haw ang maiin Sabengtung chunga chuangin Jerusalem-ah ropui takin a lo lut ta a! Mipuiin nasa takin an lo hmuak a, Tumkaute, hnahchhawlte an lo keng a, an lo vai suau suau a, “Hosanna Israel-te Lal chu fakin awm rawh se, Davida Fapa chu chawimawiin awm rawh se,” tiin Jerusalem khawpui nghawrnghing khawpin an lo au va. Juda Puithiamte leh Pharisai te’n itsikin an thinrim chu an puakkeh lo chauh ta mai a. Isuan chu chu a lo hriatin, “Ka hrilh ang che u, hengte hi an ngawih reng chuan lungte tal a au chhuak tur a ni”(Luka 19:40) tiin an mahni a hrilh a ni.

Isua pian hma kum 500 kalta velah Zawlnei Zakaria chuan Isua Jerusalema ropui taka a luh tur hi a lo sawi lawk daih tawh a, “Aw zion fanu nasa takin hlim rawh, Aw Jerusalem fanu au chhuak rawh. Ngai rawh i Lal i hnenah a lo kal e, inngaitlawm takin Sabengtung no chung ngeiah a chuang e”,(Zakaria 9:9). Engatinge Sabengtung kher kher? Sakawr chu indona atan an hman thin a ni a, Sabengtung chu muanna entirnan Lal chuanna a ni. Isua chu muanna Lal a ni a, tharuma hmelmate do turin Jerusalemah a lo kal lo, a Lal ram rawn din tura chu, ngilneihna, inngaihtlawmna, dawhtheihna, thuhnuairawlhna, retheihna, riltamna te hmangin a Pa thuawihin a tawp thlengin a tuara a thi a ni. Jerusalem ropui taka a luh hi a lalram din tura HNEHNA kawng zawhna a ni. Ani chu hnehtu Lal a ni a, retheihna chu a tawp thlengin a tuara, chumi azarah hnehna chu a chang ta a, Pathian Lal ram chu a rawn din thar leh ta a ni.

A zirtirte hnenah, “In hmazawn khuaah sawn va kal u la, Sabengtung no thlun tuma la chuan ngailohna in hmu ang, phelh ula, rawn kai rawh u. Enga tannge? tia miin an zawh che u chuan, ‘Lalpa’n A duh ani’ ti ang che u” a ti a(Lk 19:29-31). Kohhrana kan Hruaitute u, mite hnen a thlen theihnan Lalpa’n a duh che u. Nu leh Pa te u,in  chhungkua a lo luhnan Lalpa’na duh a che u. Thalaite u, chanchintha thehdarh turin Lalpa’n a duh a che u. Kan nunin Lalpa i chawimawi ve ang u.