- Vincent Zosangliana
Vawiin Chanchin\ha Matthaia 11:25-30, chumi lai chuan Isuan a bia a, “Aw ka pa, Lei leh van Lalpa, nangin mi fing leh mi bengvarte hnenah heng thu hi i zep a, nausente hnena i puan avang hian ka fak a che. Ani Ka Pa, chutiang tih chu i ngaihin a \ha a ni. Ka Pa in thil engkim mi kawltir tawh: Pa lo chuan tumahin Fapa hi an hre lo; Fapa leh an hnena Fapain a puan duhnate chauh lo chuan tumah Pa chu an hre hek lo”.
“Nangni thawkrim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bât ula, ka hnenah zir rawh u: thuhnuairawlh leh rilru inngaitlawmtak ka nih hi; tichuan, in thlarau tân chawlhna in hmu ang. Ka nghawngkawl chu a nuam a, ka phur pawh a zang a ni.” a ti a.
Isua thusawi bung hnihna hi keini mihringte retheihna leh mangan buainain a tuam mek te min sawmna leh min rawn thlamuanna, thlamuanthlak tak chu a ni. “Nangni thawkrim leh phurrit phurte u, ka hnenah lo kal u la, keiman ka chawlh tir ang che u”, Mihringte harsatna leh mangan buaina tawk mekte hnenah khawvel mi ropui leh thiltithei engang pawhin, he Isua thlamuanna thusawi hi tuman an la sawi ngailo. He Isua thusawilai hretute thinlung chu a khawih hle ang tih a zuk suangtuah theih awm e. Khatih hunlai khan tunlai mite ang thovin mipui/mimirin \anpuitu leh an harsatna chhawk theitu an mamawh ngawih ngawih a, Isua zuitu pawh kha an tam thei hle a ni. Tutemahhi harsat buaina tawklo, mimal leh chhungkua an awm lo. Hetihlai hian Isuan a thusawi hi a phâ in a inhnukdawk lo. Chutihahnekin, vawiduailo a sawinawn zawk a ni. Vawiinni hian keini ho hnenah pawh hian a la sawi reng a ni. “Nangni thawkrim leh phurrit phurte u, ka hnenah lo kal u la, hahchawlhna ka pe ang che u.” Min chhawk thei takmeuhlo nisela, Isuan he thu hi a sawi ang em? Min chhawk thei takmeuh anih si chuan Amah chu kan pan ve mai dawn lawm ni?
Phâr natna veiin, “Lalpa i duh chuan min tithianghlim thei e”(Mat 8:2) a ti a. Isuan a hnar em? A han ban a, a dek a, “Ka duh e, lo thianghlim tawh ang che” a ti a, chawplehchilhin a lo thianghlim ta nghal mai a ni. Zeng pakhat, mahnia chesawn thei reng reng lo an rawn zâwn a, a nun pumpuiin Isua \anpuina a ngen nasat zia Isuan a hmuhin, “Ka fa, thlamuang takin awm rawh, i sual te ngaihdam a ni ta”(Mt. 9:2) a ti a, a thova inah a haw nghal mai a. Uirelai an man, lunga denhlum tur pawh kha, minute reilote chhungin lungin an deng anga, a thi mai dawn tih hmeichhia khan a inhria a, thihmai chu a hlau hle anga, a rilruin \anpuitu a zawng nasa hle ngei ang. Isuan engtinnge a tih? “Thiamloh ka chantir lova che, kal la sual leh tawh suh”(Jn. 8:11) a ti a. A manganna ata chhandam ani ta.
Chuvangin, vawiin Isuan nang leh kei min sawmna hi kan la hawisan reng dawn em? Thinlung taka Isua lam kan hawi duhlohna chhan chu, chapona avang ani fo \hin. Mahniin nung thei tawka inngaihna kan nei a, Isuan min sawmna hi kan thinlungah a ri a ring theilo \hin a ni. Isua-ah chauh thlarauah leh taksa-ah damna a awm a, kan phurrit, manganna min chhawk theitu chu Isua chauh ani tih ring tlatin kan rinna i nunpui teh ang u.
No comments:
Post a Comment