PATHIAN THUSAWM PEK-2 (30.03.2014)

-Vincent Zosangliana

5. AHLUI: Tual that suh.

ATHAR: Midangte nun i zahin an thinlung tinatu ni suh ang che. In Pa vana mi lainatnaa khat anih angin Nangni pawhin midangte chungah lainatna in nei tur a ni. Midangte thiamloh chantir lo la, tichuan thiamoh chantir i ni lovang. Liam zawih zawihin midangte teh sak la, Liam zawih zawiha tehsak in i awm ang. I chunga \hate hnenah chauh \hat chhuah lo la; Nangmah hawtu te chungah pawh hmangaihna leh \hatna lantir ang che. A hawtute chungah thil \ha ti la, anchhe lawhtu che chu malsawm la, nangmah sawichhetu che u chu \awng\ai sak ang che.

6. AHLUI: Uire suh.

ATHAR: I nupui/ Pasal chunga rinawmna mai chu duhtawk lovin, nangmah i inhmangaih angin i taksa pumkhat anih avangin i hmangaih tur a ni. Taksa pawnlam rinawmna mai chu a tawk lova, i kawppui lakah thinlung leh thlarauah i rinawm tur a ni. Hmangaihna chu thinlung chhungber a\anga chhuak anih loh chuan nupa nun chu meidilah a chang thei a ni.

7. AHLUI: Rukru suh.

ATHAR: Ruk ruk dan kawng tamtak a awm: Miten an mamawh tih hre reng siin mahni mamawh bak inchhekkhawl vaka, mite tana sem phal loh chu ruk rukna kawng khat a ni. Hausaka miretheite ngaihsak silohna chu rukrukna kawngkhat a ni. Lei hausakna zawng zawng hi mitinte tana Pathian ruat a ni si a. Mihring nunphung pangngaia nung turin mitin ten kan mamawh ang kan neih chu kan phu \heuh a ni. Chuvangin hei hi ka hrilh a che u: A diltu apiang che hnenah pe la; Ril\am hnenah eitur pe la; Hak tur nei lo hnenah hak tur pe la; Mikhual leh chenna tur neilote i inah hruai lut la, Pathian malsawmna Eng chuan a awmpui zel ang che.

8. AHLUI: I vengte chungah thuhretu dikloah \ang suh.

ATHAR: Midangte tan Eng ni la, harsatna leh phurrit thlentu ni lovin an kawng daltu ni suh ang che. Thu leh \awngkaa mite hmasawnna ni la, an tan hlimna leh thlamuanna thlentu ni ang che. Tichuan an nun chau leh ro tak tan MANNA petu ilo ni ang. Mite tana thu\ha sawi tur i hriatloh chuan ngawi mai zawk ang che.

9. AHLUI: Midangte nupui awt suh.

ATHAR: Chakna sual leh thiltihin i uire thei a, thinlungah mahni kawppui nilo itna sual chu uirena ani a, thinlungah a uire tawh a ni.Chuvangin in thinlung thianghlim taka vawng reng turin \an in la tur a ni. Leichhung hmuh theihloh a\anga tuiin hnar a nei ang hian thil kan tih \hinte hi thinlung chhungril ngaihtuahna a\anga lo chhuak an ni. Luihnar a thianghlim chuan tui lo chhuak pawh a thianghlima, mihring tan intlak a lo ni angin ngaihtuahna sual leh bawlhhlawhna lak ata inthinlung a thianghlim chuan Pathian chenna tlak a lo ni anga, chumiah chuan thil\ha a lo awm anga, khawvela awm hi nuam i ti ang.

10. AHLUI: Midangte sum awt suh.

ATHAR: Ka hrilh a che u: Midangte sum leh bungrua reng reng awhna \halo i nei tur ani lo. He khawvelah hian ro khawl i tum tur ani lo. Duhamna sual lakah inveng ang che. I duh ang zawng zawng nei vek la, i thlarau chan si la enge a sawtna awm? Pathian hnenah leh a mit hmuhah thinlunga hausakna zawng zawk ang che. Midangte hnen a\anga i awh tur chu: hmangaihna, ngilneihna leh thinlunga thuhnuairawlhna chu i awt fo tur a ni.

Unau duhtakte u, heng Pathian THUPEKTE hi hmangaih leh ngaina takin huphurhna leh hlauhna tel lovin zawm tum ila. Thupek sawmte hi i hrereng theilo anih pawhin pahnih tal hriat tum ila, chungte chu: Thlarau leh Thinlung zawng zawnga PATHIAN HMANGAIHNA leh MIDANGTE HMANGAIHNA hi i vawng tlat ang u. Thusawmpekte hi en lova sawi chhuah theih lam aiin kan nunpui em? tih lam hi a pawimawh zawk a ni. Hmangaihna Pathian hnenah chuan i kir leh ang u; Pathian chu hmangaihna a ni. Tupawh hmangaihna nei chu amahah Pathian a cheng a, amah chu Pathianah a awm bawk a ni. Pa Pathianin min hmangaihna avangin khawvelah hlim takin i cheng ho ang u. A MEN.