Pathian khawngaihna azarah Hruaina Eng chuan Kum 2014 a lo chuangkai leh ta der mai a. Hei leh chen tluang taka Hruaina Eng a kal theihna chhan chu Ringtu mipuite leh min hruaitu Pathian vang a ni tih kan hriatin, Lawmthu kan sawi mawlh mawlh a ni.
Kum kalta a Editorial Board te thawhrimna leh inpekna kan chhuanga, Kum 2014 ah hian an hnu kan chhui zo lovang tih kan hlau hle a ni. Kum a thar angin Editorial Board member tharte pawhin kan tlinlohna leh thatchhiatna zawng zawngte hre reng mah ila, thuawihna nun nen kan hruaitu hmasa te kawngsial chu zawh chhunzawm turin kan lo penchhuak ve ta chu a nia le...engtak kan ang ve dawn chu ni maw?
Engpawhnise, hruaitu hmasate kut leh ke hmachhuanin leh mi remhre zawkte zarah beiseina neiin kan penchhuak ve tawp chu a nia, chhiartute puihna leh tawiawmna kan mamawh dawn hle a ni. Sel kan ngaih hunah min sel ula (mahse in huatna tel lovin), Fak kan ngaih hunah pawh Thinlung fakna chu ri chhuak lo mahse kan pawm thei reng a ni.
A tawp berah chuan, Ringtu Mipui tinte hnenah he chanchinbu hian chanchintha thlen mawlh se la, kan hlawkna aiin min hlutpuina kha kan tum leh kan beisei zawk chu a ni. Tluang taka ‘HRUAINA ENG’ a kal reng theihnan chhiartu zawng zawngte’n min lo Tawngtai pui theuh dawn nia.
No comments:
Post a Comment