-Vincent Zosangliana
Mihring piang chhuak tawh reng reng, khawvela mi ropui bera kan ngaih te pawh hian an mahni in ropuina an nei lova, Pathian vanga ropui an ni chauh a. Mihring tupawh mai hi Pathianin a thilsiam zinga mi naran ve mai vek kan ni. Miin a chhia leh tha hriatna hmanga, mahni hmasialna tel lova a nun chuan Pathianin a ropuina puanchhuahna hmanruaah a hmanga, Pathian avangin a ropui mai chauh zawk a ni. Thuthlunghlui huna Miropui, Abrahama te, Mosia te leh zawlneite pawh an mahni an ropui hrim hrim ani lova, Pathian hmanrua ah an inphal a,mahni tana nung lovin Pathian leh an mihring puite tan an nun an hman avangin an ropui chauh a ni. Mithianghlim kalta, mi ropui tak takte leh Mother Teresa ngei pawh mahni hmasialna tel lova an nun an hman avangin, mirethei, engmah neilo kha khawvel miropui an lo ni zawk mai a ni.
Vawiin kan Chanchintha chhiar ah pawh, Isua nausen anihin A Nu Mari leh leh Josefa ten Juda sakhaw danin Temple-ah an hlan a, Temple-a rawng lo bawltu Puithiam Sumeona’n a lo hmuh veleh Thlarau Thianghlim hriattirna in Pathian hnenah a au chhuak ta a. “Aw Lalpa tunah chuan I chhiahhlawh hi thlamuang takin I chawlhtir thei tawh ang, I chhandamna mitin mithmuha I puan chu ka mitin ka hmu ve ta e. I mi Israel te ropuina tur, I eng hnamtin hnena I puan tur chu ka hmu ve ta e” a ti a. Khawvel thim chhah takin a tuam Mihringte nen hlimna leh ropuina eng chu Krista ah hian a lo thleng ta a.
Chuvangin, vawiina Krista Temple-a hlanna Kut kan hmanni hian, Krista eng chuan mitin nun rawn tieng turin kan tawngtaia a. Nun hlimna eng neilo zawng zawngte hnenah Krista khawvel eng chuan hlimna rawn thlen mawlh se la. Keimahni ngei pawh hian Nun hlimna eng nei turin tisa leh thlarauah mamawh tamtak kan nei theuh a, chu nun hlimna eng nei tur chuan keimahniah daltu, kan nunah daltu enge awm? Inbih chiang ila. Mahni hmasialna te, duhamna te, tisa chakna lama kan lo pen tawhna te hian keimahniah nun eng leh hlimna leh ropuina te daltu a ni thin tih hriain Krista khawvel eng , Eucharist-a dawngtute kan nih ang hian Krista duhdan hi kan nunah lal sela, mahni hmasialna leh tisa chakna leh hlimna te hi hawisan ngam ila, Mihring chaklo leh thilsiam engmahlo mai kan nihzia hriain Krista rilru leh A duhdante kan nun hruaituah hmang ve ila, khawvel miropui kan ni ve thei tih i hre nawn leh ang u.
No comments:
Post a Comment