- Vincent Zosangliana
Vawiin hian Kohran chuan khawvel pumah kan Lalpa vân lawnna ni a serh a, kan hmang a ni. Krista kan lu chu vânah kan tân hmun siamin a lo han lawn hmasa a, keini hi a taksa pengte kan nih avangin eng niah emaw a awmna vânah chuan kan la kal ve ngei dawn a ni. Chutah chuan chatuanin kan hlim kumkhua dawn a ni.
Unau duhtakte u, Tirhkoh Paula’n min hrilh angin, “Chunglam, Pa Pathian dinglama \hu, Krista awmna chu” Tirhkohte ang khân vawiin hian kan thir reng a ni.(Kol 3:1-2) Chatûana kan awmna tûr chu kan thlir a ni. Engvanga thlir nge kan nih? Krista, thihna a\anga tho leh a chu kan hma hruaitu a ni a, nakin a kan la awm ve na tûr chu kan thlir reng a ni. Ani chuan kan awmna tûr min lo buatsaih sak a, heivang hiân Galili mite angin vân lam chu kan thlir reng a ni.
Isua vânlawnna ni, vawiina kan hman nachhan kawnghnih a awm a: (1) Isua’n he khawvela kan chhandamna hna a thawh zawh hnuah Pa Pathian in ropuina chungnung bik a pek avangin Pa Pathian hnenah fakna kan hlân a ni. (2) Keini Amah zuitute hiân Isua hna chu chhunzawmin mite chhandamna hnathawh chu kan mawhphurhna leh kan tih tur a ni tih min hriattir a ni.
Apostolte thurinah, “Isua Krista Kan Lalpa vânah a lawn a, tunah Pa dinglamah a \hu tih ka ring” tiin kan rinna kan puang a. Hei hi Marka chuan, “Isua Krista chu Pa Pathian dinglam a \hu turin Vân a lâk chhoh a ni a” a ti a (Mar 16:19). Luka chuan, “An mahni mal a sawm zawhin an hnen a\ang chuan vân a hruai chhoh a ni a” a ti a.(Luk 24:51). Isua’n a ropuina nei lêt leh tûra vâna a lawnna hi Tirhkoh Paula chuan chiang takin a lo sawilawk tawh a, “Isua’n thih thlenga thu a awihna avângin Pathianin a chawisang ta a, hming zawng zawnga hming chungnung ber pein, Isua chu Lalpa a ni tih lei tinrengin an puan nân” tiin (Phil 2:8-11).
Isua vâna a kir dâwn hian a zirtirte chu a hnathawh chhunzawma, mitinin Pa Pathian an hriat a, an hmangaiha, chhandama an awm theihnân, mitin hnenah chanchin\ha hril tûrin thu a pe a. “He khawvelah ka hnathawh tur ka zo ta, in thawh ve a hunta, mitinreng chhandama an awm theihnân, Pa thil tum chu rawn ti puitling rawh u le” a ti a ni.
Mahse, Isua’n anmahni chu a kalsan lovang tiin an hnenah thil pahnih a tiam a: (1) An zinga awmreng a intiam a. (2) |anpuitu Thlarauthianghlim an hnena tirh a tiam a ni. He thil pahnih avâng hiân zirtirte chu lawm êm êm in Jerusalem-ah an kir leh a ni (Luk 24:52). Jerusalem a\anga \anin chanchin\ha hril chu \hahnemngai takin an \an ta a ni.
Keini hi vawiinah zirtirte mawhphurhna chhunzawmtute kan ni a, kan awm mai mai thei lo a ni. Mahni hmazawnah, mahni theihna kawng \heuhvah taima leh \hahnemngai taka thawk turte kan ni. Apostolte’n Krista hmingin thilmak tamtak an ti a. Ramhuaite mi kawchhung ata an hnawtchhuak a, damlote chungah kut an nghat a, an lo dam leh ta a, anmahni hmangin Lalpa’n hna a thawk chhunzawm zêl a ni. Keini hi lalpa’n min hman ve a duh a, kan inphal em?
Galili mi te’n vân lam an thlir reng ang khân, keini pawhin Eucharist-a Kan Lalpa Isua Krista chu en reng ila, A ni chu kan chakna leh engkima kan engkimah hmangin Catholic rinna êng hi huaisen takin kan vêl amite hnenah i puang ve ang u le!!!
No comments:
Post a Comment