"Rosary ka sawi peih lo", "a tuina ka pawh lo" titute hi chuan a tuina pawh tur khawpin an la sawi lo a ni ang. Rosary hlutna leh thiltihtheihna hmu tawh Rosary ning hi ka hre ngai lo.Mari inlarna hmun hrang hranga a thuchahahte hian Rosary hi thlarau hriamhrei tha tak a nih thu kan hmu reng a. Mithianghlim kan tihte pawh Rosary ngainaa nitina sawi thin an ni.
Vawiin in chhungkua (i fate a) i tuh rah tha kha i la tel dawn a. I tuh loh leh i thawh loh rah pawh i la seng dawn a ni.I fate kha an fel chungchuang a nih ngawt loh chuan an len hunah Kohhran Zirtirna an hre thut dawn bik lova. An tet lai atang i tuh kha an nunah an senglut dawn zawk a ni. An thanlen hnua tanlak vak hi tha hle mahse a sawt lo fo. Rosary pawh hi sermon thupui a ni ber lova. Mahni nuna sengluh leh nunpui hi kan tum ber tur a ni ang. Mi ram khawi emaw a Mari thilmak chu a hlu thlawt a ni. Chuti ang bawkin thil hlu tak leh pakhat chu i nuna Mari i sengluh hun kha a ni. Nangmahin Rosary i sawi ngai em ? In chhungkaw tawngtainaah Rosary in hmun a chang em ? Malsawmna tam tak beisei si hian kan tih ve tur pangngai pawh hi kan ti mang lo a nih chuan enge kan chan ang le ? Rinna pawh hi a hlu thlawk mai, Mahni nuna Pathian thatna, ngaihdamna, khawngaihnate kan tem hun hi hlawk taka thlaraua kan nun hun a ni dawn a ni. "Khawngaihna chunga khawngaihna" ti a Johanan a sawi ang khan, Sacrament kal tlanga khawngaihna kan dawn pawh hi nitinin a pung tur a ni. Hmanraw tha tak pawh hi ka hman duh loh a ka hman duh tlat loh chuan a hlutna a bo tial tial dawn a ni. Rosary beihrual thlaah hian Rosary sawi uar ila. A hlawkna teltu leh hmutu ni ngei turin duhsakna ka hlan a che u.
- Fr. Denis Lalfela sdb
No comments:
Post a Comment