- Vincent Zosangliana
Ka unau duh takte u, kan mihring puite nitin kan inkawmtlang \hin hi kan nunphung pangngai a ni a. Achâng chuan kan hmangaih zawng takte, hmundanga kal turte pawh kan thlah \hin. Hmangaih leh inngeih taka kan cheng ho hi kan nun tinuamtu a ni a, hei vang hian Isuan, “Ka hminga mi 2/3 in awmnaah chuan ka tel ve zel ang” a ti a ni.
Vawikhat chu Unau pahnih hian Lo an nei dun a, an thawhchhuah chu inzatin an insem \hin a. Pakhat chu tlangval a ni a, pakhat chu nupui fanau nei indang tawh a ni. Nikhatchu a tlangval zawk khan hetianghian ngaihtuahna a nei a, “Kan thawhchhuah a inzât a, kan insem \hin hi a diklo tawp mai, kei chu keimah mai ka ni a, ka unaupa chu nupui fanau nei tawh leh chawmtu a ni si a”, a ti a. Tichuan zanah a rukin a thova, a unaupa buhzemah chuan ama buh chu a chhung ta a. Chumi zan chuan chutiang chiah chuan a unaupa chuan ngaihtuahna a nei a. “Kan thawhchhuah a inzât a kan insem hi a diklo, kei chu ka nupui leh ka fate pawhin an thawk thei a, ka unaupa chu amah chauh thawkchhuaktu ani si a” a ti a. A buhzem ami chu a rut a, a unaupa buhzemah chuan a chhung ta a. Zan thimah chutianga an tihlai chuan an insupalh ta a. An thiltihdan an inhriat chhuah chuan, hmangaihna avang chuan an inpawm ta vawng vawng a. Chuveleh van a\angin “AW” an hre ta a. “Heihi ani ka chenna Temple chu, hmangaih taka mi an chendunna hi”, a rawn ti a.
Unau duhtakte u, vawiin chanchin\ha khan he thu hi min rawn hrilh a ni. Inngaihsak tawn lohna hi sual a ni. Isuan, “Ka hminga mi 2 emaw 3 emaw an awmnaah chuan an zingah ka tel zel ang” a ti a. Engtinnge Ama hminga kan awmho dan tur chu? Hmangaihna nena chengho in, Inngaihsaktawnin; pahnihnaah, inenkawl tlângin; pathumnaah, hmangaihna nen inzilh tawnin a ni.
Ahmasaber hmangaihna nen inngaihsak tawna chengho tur hi kan ni a. Inngaihsak tawn lohna hi sual a ni. Kainan a unaupa Abela chu, “Ka unaupa enkawltu em ka nih?” tiin a that hial reng a ni. Pope Paul-VI-na chuan, “Ka unaute enkawltu ka ni”a ti a. Tunlai nunah midangte kan ingaihsak tawnna hi kan nuna thil mawi tak chu a ni. Mi hming\hatna tur ngaihtuahsak te, an chhandamna tura buaipuite hi. Pathian pawhin midangte ngaihsakna chu a nun a ni a, keini pawhin kan nundan tur a ni.
Pahnihna inenkawl tlanna hi rawng kan inbawl sak tawnna a ni a. Mitin te mamawh leh pawimawh hmasa ber chu Ei leh bara in\anpuina te, thawmhnaw lama in\anpuinate, awmna tur neilo ngaihtuah sak te, Damdawi lama damlo \anpui leh theih ang tawka chhawmdawlte a ni. Hmalam pana a inzahtlanga, inchawimawi tawnin, inlawm tlang tur kan ni.
Pathumna, hmangaihna leh ngilneihna nen inzilh tawn tur kan ni. India chhimlamah nu leh pa ten an fate \hatna turin na tak takin an zilh \hin. Mizoramah chutiangchu kan la hmu vak lova, Biakin chhungah pawh naupang awmmawhte zilh kan inthlahdah deuh em te pawh a tih theih. Kan ngaihsaklo pawh a ni ang, thudik leh \ha Isua thuah kan cheng tur a ni.
Vawiin chanchin\ha kan ngaihthlak ah khan Isuan Kristiante zinga awm\ha duh lo zilh dan tur kawng thum min kawhhmuh a. Pakhatnaah chuan mahnia zilh turin; pahnihnaah chuan midang 2/3 emaw hruaia zilhin; pathumnaah Kohhran mite a huhova kala zilhin. Amaherawh chu, zilhna chu hmangaih leh ngilnei taka tihtur a ni. Hmangaihna chuan mi diklo tân \anpuina a pe a, Kristian mawhphurhna ani bawk a ni. He mawhphurhna hi kan pumpelh thei lo.
Thuchhiar 1-na ah kan entawn tur zawlnei Ezekiela awmdan kan hmu a. Ezekiela chuan a mite zilhin, Pathian hnena hruaikir leh chu harsa a ti em em a, mahse Pathian mi a nih angin a mawhphurhna ani si.
Thuchhiar 2-na ah entawn tur Tirhkoh Paula kan hmu leh a. Kan zain kan nunah bat kan neihzia min hrilh a. Hmangaihna leh inngaihsakna chu lainat taka inzilh tawnin lantir tur a ni. Hmangaihna leh inngaihsak tawnna chuan kan zinga awm\haduhlo deuh te Pathian hnena hruaikir leh turin thiltihtheihna ropui tak a ni.
Engtinnge kan inzilh ang? Hmangaihna leh ngilnei taka inzilhna chu Paula’n a sawi angin midang dêuna leh thiamloh chantirna ani tur a ni lo. Chutiangin, ruihhlo ngaite pawh a hau zawng nilovin, ngainatawm takin a \hatlohzia hrilhin ni zawk se. He zawlnei hna midangte zilhna hi vawiinah vantlangah a pawimawh em em a ni.
Eucharist hmangin Krista zarah Pathian nan kan cheng dun a, mi 2/3 mai nilo; mi 200/300 kan chengho a ni. Mi 2/3 te dilna petu hnenah chuan enge kan dil ve tâk ang le? Ahmasaberin mahni insiam\ha turin a KHAWNGAIHNA i dil ang u. Pahnihnaah midang siam\hatu ni turin; pathumnaah kalbo mekte hruaikir thei turin huaisenna leh khawngaihna dil ang u. Pathian chuan kan dilnate, a khawngaihnain min tihhlawhtlin sak rawh se.-A MEN.
